Bilboko kaleetan zazpigarren gola sartu dute euskal herritarrek. Euskal Herria nazio bat selekzio bat lemapean, milaka lagun batu da. Euskal Herriko kirolariek abiatutako ekimenari, herritarren sustengua gehitu zaio oraingoan. Urrats garrantzitsua Euskal Herriko selekzioen ofizialtasunera bidean.
Gora Euskal Herria!
Ez dago hitzik gizon eta emakume hauek mahai gainean jarri duten konpromisoa parekatuko duenik. Gaur, Bilboko kaleak bete ditugu, zuekin gaudela agertzeko! Bat egiten dugula adierazteko eta aurrerantzean, zuek irekiriko bideari indar guztiz ekingo diogula esateko.Aurten, ezin izango ditugu Euskal Herriaren ordezkariak zelaian jokatzen ikusi. Zelaian diot, zelaitik kanpo, azken urteotako futbolik onena ikusteko aukera izan dugulako.
Euskal Herriko kirolariak eredu ditugu. Ideologia, alderdi eta interes pertsonalak albo batera utziz, herri gisa jokatzen jakin dutelako dira gure eredu. Palkoetako poltronak betetzen dituztenak, kirolariak egurtzera besterik ez dira jaitsi.
Eusko Jaurlaritzaren jarrera lotsagarria da. Lotsagarria izan da kirolariei ezarri dieten inposizioa. Gaur egun garbi esan genezake, Eusko Jaurlaritzako kiroletarako arduraduna euskal kirolariak administrazioaren baitan zatiturik izateaz arduratzen dela. Mugak, Gobernu espainolak eta frantsesak jartzen badituzte ere, muga horien zaindari bihurtu dira Gasteizko Jaurlaritzako agintariak.
Herri kiroletan ezarri nahi dituzten inposizioez mintza gintezke edota atletismoan nahiz mendi lasterketetan, zergatik ez dieten nafar irabazleei saririk ematen. Horri guztiari erantzun beharko lioke GARAIk, Azkarate andereak edo zergatik ez, autonomia erkidegoko lehendakariak.
Gaur, hori baino gauza garrantzitsuagoa egin nahi dugu. Partida irabazten jarraitu nahi dugu, horregatik herriz herri eta kirolez kirol eraman nahi dugu futbolariek eta goi mailako kirolariek abiaturiko ildoa.
Gaurtik aurrera, Euskal Herri osoan antolatzen diren txapelketa, liga edota partidetan agerian utziko ditugu oinarrian zatiketa administratiboa duten diskriminazio guztiak. Bestetik, Kirolariekin elkarlanean, Euskal Herria oinarri duten kirol lehiaketak antolatu eta bultzatuko ditugu.
Lehen harri bat jarri nahi dugu Euskal Herriko federazio nazionalak osatzeko bidean. Orain, bidean aurrera egin behar dugu guztiok, zazpiak bat, kirolariekin bat, kirol talde nahiz klubak bildu eta Euskal Herri osoko federazioak sortzeko garaia da.
Alderdi, ideologia eta pentsaera ezberdinez gaindi, kirolariek erakutsi bezala, herri gisa indarrak biltzeko garaia da. Euskal Herria oinarri izanik eraiki dezagun gure etorkizuna gaurdanik.
ESAIT osatzen dugun gizon eta emakumeok helburu hau lortzeko tresna izan nahi dugu. ESAIT bide honetan indarrak biltzeko eta antolatzeko tresna izango da eta ikusi duzuen bezala aurrean dugun erronka ez da makala. Beraz ekin diezaiogun lanari!
Gora Euskal Herria!
1 BERRIAK nagusia | 28.12.2008 18:52 | 2 Comments
Egoitz Askasibar (ESAIT) Berria.info guneko elkarrizketa digitalean.
ESAIT Euskal Selekzioen Aldeko Iritzi Taldeak manifestazio nazionala deitu du hilaren 27rako, ‘Euskal Herria, nazio bat, selekzio bat, federazio bat‘ lelopean. Bilbon izango da. Aurten ez du futbol selekzioak lagunarteko partidarik jokatuko, EAEko Federazioaren eta futbolarien arteko desadostasunengatik. Jokalarien alde atera da ESAIT.
1 BERRIAK nagusia, 4 PRENTSA gunea, 3 MULTIMEDIA | 23.12.2008 16:06 | 1 Comment
2 TRESNAK zabaldu mezua | 23.12.2008 10:05 | Comments Off
Herriz herri selekzioaren alde
Gasteizko Soin Hezkuntzako Erakundeko (IVEF) ikasleak dituzu pankartaren atzean, Euskal Herriko selekzioa aldarrikatuz.
Baina Euskal Herrian zehar hedatu da argazki hau. Kirolariak eta herritarra Nazio bat selekzio bat federazio bat Euskal Herria esatera atera dira zelaira.
Munduko mapa honetan ikusi dezakegunez, agerpenok geolokalizatu egin ditugu, herriz herri ikusi dezakegu zelan selekzioaren aldarrikapenak perretxikoak udazkenean bezela sortu eta hedatu diren.
esait map
1 BERRIAK nagusia | 23.12.2008 10:00 | 1 Comment
Euskadiko Futbol Federakundeak pasa den abenduaren 20an jakinarazi bezala, tamalez, aurtengo abenduan ez da San Mamesen gizonezkoen selekzioak jokatzekoa zuen partidarik izango. Federazioaren jarrerak, emakumezkoen partida ere bertan behera geratu izana ekarri du. Egoera honen aurrean, gauzak argitze aldera, honakoa adierazi nahi dugu:
1.- Gizonezkoen selekzioari “Euskal Herria” izena jartzea Euskadiko Futbol Federazioak eta futbolariok elkarlanean hasitako bidearen ondorioa izan zen, alde bien oniritziz adostutakoa. Federazioko kideek jakinarazi zigutenez, adostasun horren berri Kataluniaren aurkako partida baino lehen behar zen leku guztietan eman zuten eta ez zuten aurkako iritzirik jaso. Ondoren sortu dira arazoak. Aurten “Euskadi”ra itzuli nahi izatearekin Federazioak emandako hitza ez du bete eta elkarrekin aurrera pasuak emateko hitzartu genuen bidea bete-betean moztu du.
2.- Federazioko ordezkariek beraien artean izan dituzten tira-birak tarteko, ezin izan dira bilerak behar ziren argitasun eta zehaztasunarekin burutu. Zentzu honetan, beraiek publikoki ukatu arren, argi eta garbi baiezta dezakegu, Eusko Jaurlaritzako Kirol Zuzendariak prozesu honetan izandako esku-hartzea. Ez bakarrik “Euskadi” izena inposatzean, baita bileretako partaideen osaketan ere.
3.- Aurrera begira, borondate osoa dugu arazo guztia konpondu, Euskal Herriko zazpi herrialdeetako jokalariak batuko dituen futbol selekzio ofizialaren aldeko pausuak ematen jarraitu, adostasunetara iritsi eta partidak jokatzen jarraitzeko. Baina, alde baten borondatearekin ez da nahikoa. Hartutako konpromisoak betetzen ez badira, nekez egin daiteke aurrera. Hitzez bada ere, azken bileran batu ginen hiru aldeek biltzen jarraitzeko eta ofizialtasunaren bidean aurrera egiteko konpromisoa hartu genuen. Gai hau lantzeko, behin baino gehiagotan eskatu izan dugu alde guztiak bilduko dituen komisio bat sortzeko. Oztopoak gainditu eta guztion artean aurrera egitea da gure ustez biderik egokiena. Aitortu behar dugu, beraien aldetik bat-batean aurrera egiteko “borondatea” partida jokatzeko 6 egunen faltan eta partidua arriskuan zegoela ikusi zutenean azaltzeak, zalantzak sortzen dizkigula.
4.- Aurten partidarik ez izatea albiste txarra da, inolako zalantzarik gabe. Baina sortu den saltsa guzti honek alde bakoitzaren asmoak, borondateak eta benetako aurpegiak ikustarazteko balio izan badu, gaitz-erdi. Horretan behintzat, zerbait aurreratu dugu.
5.- Beti esan izan dugu eta berriro diogu, izenarena azaleko eztabaida dela. Benetan garrantzia duena selekzioaren osaketa, ofizialtasunerantz eman beharreko pausuak zein diren adostea eta helburua lortzeko borondatea izatea da. Hor kokatu behar da eztabaida. Zentzu honetan, gure ikuspegia pasa den azaroan plazaratutako prentsa oharrean eman genuen. Agiri hartan emandako arrazoietan oinarritzen gara “Euskal Herria” izena egokiagoa dela defendatzeko.
6.- Hala ere, partida jokatzeko azken aukera izan zitekeela pentsatuz, azken orduko bileran, partida salbatzeko baliagarria izan zitekeelakoan, proposamen bat jarri genuen futbolariok mahai gainean: Euskal Selekzioa izenarekin antolatzea partida. Argi genuen eta argi dugu, izen honek ez duela aurrerantzean erabiltzeko balio, baina gure borondate onaren erakusgarri behintzat bazela pentsatzen dugu. Beraiek, proposamen honi ere ezezko borobila eman zioten eta garbi geratu zitzaigun “Euskadi” hitza agertuko ez zen proposamenik ez zutela onartuko; nahiz eta jakin, jarrera horrek partida ez jokatzea ekarriko zuela. Eta zoritxarrez, hala gertatu da.
Futbolarion proposamenaren ondoren etorri zen beraiena: haiek, partidua “Euskadi” izenarekin jokatzea proposatu zuten (beraien jarreraren erakusle izan da, azken-aurreko bilerara etorri aurretik, jada partidarako sarrerak eta kartelak “Euskadi” izenarekin prest zituztela). Beraz, “Euskadi” izena mantendu eta futbolariongana gerturatzeko keinu bezala edo, kamisetatan “Euskal Herria” izena eta Euskal Herriko armarria jarriko zituztela esan ziguten. Aurreko urteko kamisetarekin jokatzea, alegia. Horrela amaitu zen bilera.
Azken proposamen hau, hurrengo goizean futbolarion artean aztertu genuen eta ez zela onargarria deliberatu. Futbolarion artean, ez zen adostasunera iristeko proposamen bat bezala ikusten, sei egunen faltan, prestatuta zeuden kartel, sarrera eta kamisetekin partida “Euskadi” izenarekin aurrera ateratzeko saio bat zela ulertu genuen.
7.- Emakumezkoen partida bertan behera gelditu izana ere, orain arte esandako guztiaren testuinguru berean ulertu behar da. Euskal Herriko Futbolariok bat eginda gaude plazaratu ditugun hausnarketen inguruan. Horregatik, helburuetan eta emandako pausuetan ados egonik, partida bat ez jokatu eta bestea jokatzera joatea ez dela egokia, uste dugu.
8.- Aipagarria eta esanguratsua da, ia 1.000 kirolarik, hainbat eta hainbat gizarte eragilek, zaletuek etab. publikoki Euskal Herriko Selekzioari eman dioten babesa. Benetan, penaz hartzen dugu aurten zaletuek partida hauetaz gozatzeko aukerarik ez dutela izango jakitea. Guretzat ere, ziurrenik, urteko partidarik politena eta bereziena da. Gu, beti egongo gara ofizialtasuna lortze bidean aurrera pausoak eman nahi dituena laguntzeko prest. Baina era berean, oztopoak jartzen ari denaren jarrera ikustarazten saiatuko gara. Euskal Herriko Selekzioak sortzen duen ilusioak horrenbeste merezi du.
9.- Gure adierazpenaren baitan ez dugu lerro bat bera erabiliko, azken asteotan gure profesionaltasuna edo ibilbide profesionala epaitzen jardun duten politikari, tertuliano eta interesez beteriko komunikabideei erantzuteko. Gure sentipenetan haserrea eta egonezina erein badute ere, Euskal Herriko jendartean sinesten dugu eta uste dugu euskal jendarteak ikusten eta baloratzen jakingo duela zer gertatu den, zergatik eta nork bultzatuta. Euskal Herriko Futbolariok, Euskal Herriko selekzioarekin dugun konpromisoari eutsiko diogu.
Euskal Herrian 2008ko abenduaren 22an
1 BERRIAK nagusia, 2 TRESNAK zabaldu mezua, IDATZIAK | 22.12.2008 21:25 | No Comments
Abertzaleen Batasuna, Aralar, Eusko Alkartasuna eta Ezker Abertzaleak ESAITekin batera agerraldia eskaini dute Donostian. Bertan bat egin dute Euskal Herriko futbolariek egindako eskaerarekin, eta datorren abenduaren 27an Bilbon iragarrita dagoen manifestazio nazionalerako deialdia egin dute.
BERRIA ESAITek dio “kirol eremutik kanpo” hartu dela selekzioaz erabakia
GARA Esait respalda a los jugadores y pide respeto ante su postura
EITB Euskal Herriak nazioarteko txapelketa ofizialetan parte hartzeko eskubidea duela azpimarratu du Esaitek
ESAIT Euskal Herria, nazio bat, selekzio bat, federazio bat
Paperezko prentsan agertutakoak (abenduak 20)
BERRIA «Jokalariak ez dira partida bertan behera uztearen errudunak»
GARA La izquierda abertzale, EA, AB y Aralar se suman a la marcha
El Correo
Diario Vasco Esait culpa al PNV y al Gobierno Vasco de que no haya partido
Noticias de Gipuzkoa ESAIT culpa de la suspensión al PNV y al Gobierno Vasco
1 BERRIAK nagusia, 4 PRENTSA gunea | 19.12.2008 16:57 | 1 Comment
Euskal Herriaren aldeko aldarria, selekzioaren aldeko mezua batetik bestera ari da hedatzen.
Lehenengo argazkiak batu ditugu dagoeneko. Hasi gara gure Euskal Herriko mapa osatzen. Apurka apurka, asterik aste…. futbolarien eskaera, herri oso batena dela irudikatuko dugu. Munduak jakin dezala gure berri.
map
Euskal Herri osoan selekzioaren alde.
Zuek ere, igorri zuen argazkia, zuen mezua… eta apurka apurka, herriz herri, Euskal Herri osoko eskaera bilakatuko dugu futbolari, kirolari, gizarte eragile eta jendartean zabaltzen ari den asmo hau. Euskal Herriko selekzio ofizialak.
Hasi da giroa berotzen, hasi dira kirolariak zelaira ateratzen. Pankarta eskuan, euskal selekzioaren kamiseta aldarrikatzen duen afitxarekin. Ikusi ditugu Lekeitio eta Ondarroan, Zaldibian, Gasteizen, Barakaldon, Mungian…. eta zure herrian?
argazkiak
1 BERRIAK nagusia, 3 MULTIMEDIA | 13.12.2008 23:30 | No Comments
Euskal Herriko futbol selekzioaren inguruan sorturiko eztabaida dela-eta, hainbat eremutatik ika-mika hutsala sortu eta eztabaida arazoaren sustraietatik aldendu nahi dutela salatu nahi dugu.
Euskal Herriko Futbolariak, Euskal Herriko Kirolariak eta gaur hemen ordezkaturiko eragile sozial eta sindikalek eztabaidaren muinean bat egin dugu:
- Euskal Herriak nazioarteko txapelketa ofizialetan parte hartzeko nahia, borondatea eta eskubidea dugu. Ez erregio, ez erkidego ez eta foru komunitatea, Euskal Herria nazio bat da. Zazpi herrialdez osaturiko nazioa: Araba, Bizkaia Gipuzkoa, Lapurdi, Nafarroa Garaia, Behe Nafarroa eta Zuberoa. Lurralde horri Euskal Herria deritzo. Horregatik lurralde hori ordezkatuko lukeen selekzioari buruz mintzo gara.
- Munduaren aurrean, nazioartean gure burua nazio bakar baten moduan ordezkatu ahal izateko, lehendabizi, herrialde guztietako kirolariak bere baitan hartuko dituzten kirol egiturak behar ditugu, Euskal Herri osoko kirol egiturak, kirol federazioak. Ezinbestekoa da beraz, gaur egun, Euskal Herriko kirol egitura horien sorrera. Ofizialtasunaren lehenbiziko pausuak norabide horretan joan behar dute.
Zehazki, Euskal Herriko Futbolariak eta Euskal Herriko Kirolariak kaleraturiko agiriei dagokienean, ezin garbiago adierazi zuten helburua eta berau lortzeko egin beharreko ibilbidea.
Gaur egun federazio nazionalik izan ez harren, goi mailako futbol selekzioa zazpi herrialdetako kirolariez osatzen da; Horregatik norabide horretan pausoak emateko eskatu zuten futbolariek eta lehenbiziko pausua Euskal Herria terminoa izan zen. Iaz kirol eremuan adostasun osoa izan zuena. Duela hamabi hilabete San Mamesen eta Bilboko kaleetan euskal herritarrek ilusioz aldarrikatu zuten hura.
Kirol federazioetatik Gabonen testu inguruan burutzen den lagun arteko futbol partidua helburu bihurtu da tresna izan beharrean.
Azken 20 urtetan aurrera pausoa suposatu dute Gabonetako partidek, denborarekin ordea, autonomia desberdinen partidu gisa asimilatzea lortu dute. Euskadiko kirol federazioentzat tresna izan beharrekoa helburu bihurtzean, Euskal Herriko selekzioaren ofizialtasuna nahi ez dutenek partidua asimilatu eta espainiar estatuaren logika autonomikoan barneratzea lortu dute.
Horrela, autonomia desberdinek jolasten omen dute Gabonetan, Murtzia, Extremadura, Madril, Andaluzia, Euskadi, Cataluña… Euskal Herriko selekzioa Gabonetako autonomietako partiduen itsasoan ito dute.
Gaur egun, gero eta gehiago ari gara aldentzen etorkizuneko Euskal Herriko selekzio nazionalen norabidetik.
Egoera hori gainditzeko eta zehazturiko norabide horretan aurrera egiteari begira, pasa den urtean aurrera pauso bat eman zuen Euskadiko Futbol Federazioak: Autonomia bati ez zegokion izena eta ez zegokion osaketa, eman zion Euskal Herriko Futbol Selekzioari; zazpi herrialdeak biltzen zituen nazio baten izena eta izana hain zuzen. Gutxi batzuei ez zitzaien gustatu, hain zehazki eztabaida izenaren baitan bakarrik kokatu nahi duten horiei. Iaz, aspaldiko partez, kirol esparruan ere zerbait mugitzen zela sentitu genuen.
TAMALEZ, ATZERA EGITEN ARI GARA Eta oztopoa ez dator Madril edo Paristik. Gasteizko Gobernua da Euskadiren izenean atzera egitera behartzen gaituena. 16/2006 dekretuak behartu ditu hainbat federazio, orain arteko osaketan aldaketak eman eta nafarroako eta ipar Euskal Herriko kirolariak baztertzera. Euskadiko Autonomi Erkidegokoak ez diren kirolariak baztertzeko 36. artikuluaz baliatzen dira.
Aurten hala gertatu da atletismoan eta berdina egiten saiatu dira mendi lasterketetan. Udan Getxon izandako ur jokoetan ipar euskal herritarrak Euskadiko selekziotik kanporatu zituzten, Akitaniaren selekzioarekin aritzera behartuz.
Horretan bihurtu dute Euskadi. Hiru herrialde ordezkatzen dituen lurraldea. Datorren abenduaren 21ean, igandean Gasteizen burutuko den maratoi erdian honen adibide berri bat izango dugu. Izan ere, Euskadiko maratoi erdiko txapelketa izango da eta bertan EAEkoak ez diren euskal kirolariek ez dute saririk jasoko irabazten badute ere. Beraz, txapelketatik kanporatuak izango dira.
Jokalarien agiria eta partiduaren aurrean
Gabonetako futbol partiduak aurrera egiteko tresna izan behar du. Etorkizuneko selekzio ofizial horren norabidean urrats bat izan behar du partidak. Horregatik futbol federazioari eta atzean ezkutatzen diren indarrei dei egiten diegu, euskal kirolariak atzera egitea ez ditzaten behartu. Ez diezaioten Euskal Herriko selekzioari atea itxi. Euskal Herriak selezioa nahi eta behar du.
Jokalariak erasotuak izan dira egindako aldarrikapenagatik. Argudio gutxi eta eraso asko entzun izan dugu. Baina Euskal Herriko selekzioa ez da soilik kirolarien aldarrikapena.
Guzti hori dela eta, euskal herritarroi dagokigu oraingoan euskal kirolariak babestu eta bere aldarrikapenak gure egitea. Horregatik hemen gauden eragileok euskal jendarteari dei egiten diegu kirolariei lekukoa hartu eta haiekin batera datorren abenduak 27 larunbata, arratsaldeko 17:30etan Bilboko Aita Donostia Plazatik abiatuko den manifestazio nazionalean parte har dezaten.
Herrietako dinamikak
ESAITek Bai Euskal Herriari ekimenaren laguntzaz egitasmo hau herrietaraino eraman du. Herrietako kirolariak biltzen eta kirolarien konpromisoa zabaltzen ari da azken asteetan.
Herriz herri kirolariak bildu, autobusak antolatu, konpromisoa lortu eta argazki bidez bat egiten ari dira. Guztia ikusgai duzue www.naziobatselekziobat.org web gunean.
Hitzaldiak herriz herri
Horrekin batera, Euskal Herriko auzo eta herri ezberdinetan hitzaldiak izango dira. Gaur bertan Urdulizen, bihar Atxondon, astelehenean Urtuellan, asteartean Billabonan, asteazkenean Indautxun (Bilbo), ostegunean Laudion eta hurrengo ostiralean, hilak 19, Larrabetzu, Sodupe eta Mundakan.
Kirolariei dei berezi bat egin nahi diegu abenduaren 27ko manifestazio buruan joan daitezen eta beraien kirol talde edo eremuko kamisetekin parte hartu dezaten manifestaldian.
Bilbon 2008ko abenduaren 12an
1 BERRIAK nagusia | 12.12.2008 16:19 | 1 Comment
Abenduaren 27an, 17.30, Bilboko Aita Donostia plazan. Hori da Esaitek ezarritako hitzordua. 30 bat eragilek babestu dute, bestalde, gaur eguerdian Bilboko hotel batean eginiko agerrialdian, Euskal Herriak bere selekzio propia izaiteko eskubidearen aldeko ehunka kirolarik sinaturiko agiria.
Eragile anitzek sostengatzen dute kirolariek euskal selekzioaren alde emandako urratsa. Hala nola, ELB, EHNE, LAB, ELA, Stee-Eilas eta Hiru sindikatuek, Bai Euskal Herriari ekimenak, Etxerat ekarteak, Herria 2000 Elizak, Ahaztuak, Demoak, Torturaren Aurkako Taldeak (TAT) edo Bilgune Feministak bere atxikimendua adierazi diote euskal kirolariek selekzio nazionala aldarrikatuz zabalduriko agiriari.
Egoitz Askasibar, Itziar Arratibel eta Martxel Toledo, Esait-en izenean, Bilgune Feministaren izenean Izaskun Garrotxena, ELA sindikatuaren ordezkaria Patxi Agirrezabalaga, eta Mikel Luloaga, Bai EHren izenean azaldu dira gaurko prentsaurrekoan.
Futbolariek, heldu den azaroaren 14an, plazara zuten manifestuaren ildotik « pausu garrantzitsua eman dutela» adierazi ondoren, «oraingoan euskal herritarrei egokitzen zaie beren lekukoa hartzea» defendatu du manifestazioaren talde antolatzaileak.
Era berean, Esait-k euskal kirolarie guziei (800 kirolarik baino gehiago babestu dute futbolariek azaroaren 14rekin plazaratu zuten manifestua) beren teesertak jantzirik martxa horren «lehen lerroatan» joaiteko gonbita luzatzen diete.
Eztabaida sutsua
Azaroaren 14an futbolari gehienek Euskal Herria izenean jokatzeko apostu egin ondoren, EAEko futbol federazioak babesten duen Euskadi-Iran partida jokatzekorik bazegoen zen gaurdaino zalantza nagusia.
Are gehiago kontuan izanik akordio batera ez bazen heltzen, kirolariek manifestazioa deituko zutela iragarri zutenean. Gaur abenduaren 23an Bilboko karriketan euskal selekzio ofizialaren alde egiteko 30 bat eragilek babestu duten deialdia gauzatu ostean lagunarteko ohiko norgehiagoka jokatzea ezinezkoa dirudi.
Aipaturiko manifestuan 165 futbolarik argi utzi zuten egun hartan Euskal Herria izenean soilik lehiatzeko prest zirela heldu den abenduaren 23an Bilboko San Mames zelaian jokatzeko zen Iranen aurkako partidan.
1 BERRIAK nagusia | 12.12.2008 15:33 | 2 Comments
2008ko azaroaren 13an, Euskal Herriko futbolarien izenenean, 165 futbolari eta futbolari ohik prentsara bidalitako agiriak hautsak harrotu dituela ikusirik, modalitate ezberdinetan parte hartzen dugun Euskal Herriko kirolariok honako iritzia kaleratu nahi dugu:
1.- Agiria babestu duten futbolarien arrazoi eta erabakiarekin bat egin eta gure egiten dugu, eta Euskadiko Futbol Federazioari Euskal Herriko selekzioak nazioarteko txapelketa ofizialetan parte hartzeko bidean atzerapausorik ez emateko eskatzen diogu. Aurreko urteetan futbolariekin elkarlanean hasitako bideari jarraituz, aurtengo abenduaren 23an, “Euskal Herria-Iran” partidua antola dezatela eskatzen diogu.
2.- Gure babes osoa adierazten diegu Euskal Herriko futbolarien izenean agiria atera duten futbolari eta futbolari ohi guztiei. Era berean, inolako zentzurik gabe jasan behar izan dituzten irain eta presioak albo batera uzteko eskatu, eta, batzuk agiriaren mamiari heldu beharrean, eztabaida izenaren kontura soilik bideratu nahi izana salatzen dugu.
3.- Kasurik gehienetan, ez dugu nazioartean ofizialki gure koloreekin lehiatzerik. Gure kirol ibilbidean jarraitu ahal izateko, aurrera egiteko, eta mundu mailan prestigiorik handiena duten txapelketetan parte hartu nahi badugu, Frantzia edo Espainiako ikur eta koloreak defendatzera behartuak gaude. Gaur egun, ez dugu beste aukerarik, zirrikitu txikiena irekitzen den egunean, Euskal Herriko kirolariak zirrikitua bide zabal bihurtzeko gure konpromisoa agertzen dugu.
4.- Txapelketa ofizialetan gure herria, Euskal Herria, ordezkatzeko aukera izatea da eskatzen duguna. Horretarako, Araba, Bizkaia, Gipuzkoa, Lapurdi, Nafarroa Beherea, Nafarroa Garaia, eta Zuberoako kirolari guztiok bilduko gaituzten federazioak behar ditugu. Ez goaz inoren aurka, ez goaz inori ezer kentzera, dagokiguna aldarrikatu eta garena izan nahi dugu, ez besterik.
Badakigu, bide luzea dugu egiteko; oztopo asko gainditzeko; izerdi asko botatzeko; horregatik, ez diezaiogun geure buruari mugarik jarri, ez dezagun atzera egin. Asko gara aurrera egin nahi dugunak, indarrak bildu eta egin dezagun aurrera!
Euskal Herrian 2008ko abenduaren 3an
1 BERRIAK nagusia, IDATZIAK | 3.12.2008 18:03 | 1 Comment
